ADVERTISEMENT
ADVERTISEMENT
ફ્લોરિડાના લોયાધામ મંદિરે વડાપ્રધાન મોદીના ઐતિહાસિક કાર્યકાળ નિમિત્તે ભવ્ય સન્માન સમારોહ
ભારતીય મૂળના આગેવાનો, સંતો અને સેંકડો ભક્તોની ઉપસ્થિતિમાં વડાપ્રધાન નરેન્દ્ર મોદીને પાઠવાઈ શુભેચ્છાઓ
-
સંવાદદાતા - Tue, 16, Jun 2026
- 03:11 EDT
- 63
લોયાધામ મંદિરે યોજાયેલ ભવ્ય સન્માન સમારોહ / Image Provided
ભારતના વડાપ્રધાન શ્રી નરેન્દ્ર મોદી દેશના ઇતિહાસમાં સૌથી લાંબા સમય સુધી સેવા આપનારા ચૂંટાયેલા વડાપ્રધાન બનવાના ઐતિહાસિક સીમાચિહ્ને પહોંચ્યા છે. આ ગૌરવપૂર્ણ પ્રસંગની ઉજવણી કરવા માટે અમેરિકાના ફ્લોરિડામાં આવેલ શ્રી સ્વામિનારાયણ મંદિર લોયાધામ ખાતે શનિવાર, 13 જૂન 2026ના રોજ ભવ્ય 'ફેલિસિટેશન સેરેમની'નું આયોજન કરવામાં આવ્યું હતું.
સદગુરુ શાસ્ત્રી શ્રી ઘનશ્યામપ્રકાશદાસજી સ્વામીના દિવ્ય માર્ગદર્શન હેઠળ યોજાયેલા આ કાર્યક્રમમાં અમેરિકાના વિવિધ રાજ્યોમાંથી આવેલા ભારતીય સમાજના અગ્રણી આગેવાનો, સામાજિક કાર્યકરો અને સેંકડો હરિભક્તોએ હાજરી આપી હતી. કાર્યક્રમ દરમિયાન વડાપ્રધાન નરેન્દ્ર મોદીને તેમના ઐતિહાસિક કાર્યકાળ બદલ હાર્દિક અભિનંદન અને શુભેચ્છાઓ પાઠવવામાં આવી હતી.
આ પ્રસંગે જાણીતા ઉદ્યોગપતિ ડૉ. કિરણ પટેલ, ગ્લોબલ ડાયલોગ ફાઉન્ડેશનના ચેરમેન બાવા જૈન, ભાજપ યુએસએના ભૂતપૂર્વ પ્રમુખ ચંદ્રકાંતભાઈ પટેલ તેમજ ટેમ્પા ગુજરાતી સમાજના પ્રમુખ સંદીપભાઈ પટેલ વિશિષ્ટ મહેમાન તરીકે ઉપસ્થિત રહ્યા હતા. તેમણે પોતાના સંબોધનમાં વડાપ્રધાન મોદીના નેતૃત્વ, દ્રષ્ટિ અને ભારતના સર્વાંગી વિકાસ માટેના યોગદાનની પ્રશંસા કરી હતી.
કાર્યક્રમમાં હિંદુ સ્વયંસેવક સંઘ (HSS)ના વરિષ્ઠ હોદ્દેદારો યશવંત પાઠક, નૈનન દેસાઈ, ગૌરાંગ વૈષ્ણવ અને વિનોદ પટેલ સહિત અનેક સામાજિક અને ધાર્મિક આગેવાનો પણ હાજર રહ્યા હતા. ઉપસ્થિત મહાનુભાવોએ વડાપ્રધાન મોદીના કાર્યકાળ દરમિયાન દેશે હાંસલ કરેલી અનેક મહત્વપૂર્ણ સિદ્ધિઓનો ઉલ્લેખ કર્યો હતો.
વક્તાઓએ પોતાના પ્રવચનમાં વડાપ્રધાન મોદીના "સબકા સાથ, સબકા વિકાસ, સબકા વિશ્વાસ" મંત્રને ભારતના વિકાસનો આધારસ્તંભ ગણાવ્યો હતો. તેમણે અયોધ્યામાં ભવ્ય રામ મંદિર નિર્માણ, કલમ 370ની નાબૂદી, ડિજિટલ ઇન્ડિયા અભિયાન, આત્મનિર્ભર ભારત જેવા મહત્વાકાંક્ષી પ્રયાસો તેમજ વૈશ્વિક મંચ પર ભારતની વધતી પ્રતિષ્ઠા અંગે વિશેષ ચર્ચા કરી હતી. તેમના મતે વડાપ્રધાન મોદીના નેતૃત્વ હેઠળ ભારતે વિશ્વમાં પોતાની આગવી ઓળખ વધુ મજબૂત બનાવી છે.
આ પ્રસંગે આશીર્વચન આપતાં સદગુરુ શાસ્ત્રી શ્રી ઘનશ્યામપ્રકાશદાસજી સ્વામીએ જણાવ્યું હતું કે, "મોદીજીનું સમગ્ર જીવન રાષ્ટ્રસેવા અને ભારતીય સંસ્કૃતિના પુનર્જાગરણ માટે સમર્પિત રહ્યું છે. 140 કરોડ ભારતીયોને પોતાના પરિવાર તરીકે માનતા વડાપ્રધાન દેશ માટે ગૌરવની બાબત છે. તેમના કાર્ય અને સમર્પણથી વિશ્વભરમાં ભારતનું માન વધ્યું છે."
કાર્યક્રમ દરમિયાન દેશભક્તિપૂર્ણ વાતાવરણ સર્જાયું હતું અને ઉપસ્થિત સૌએ ભારતની પ્રગતિ અને સમૃદ્ધિ માટે શુભેચ્છાઓ વ્યક્ત કરી હતી. સમારોહના અંતે સૌએ એકસાથે રાષ્ટ્રગાન ગાઈને દેશપ્રેમ વ્યક્ત કર્યો હતો. ત્યારબાદ "ભારત માતા કી જય"ના ગગનભેદી નારાઓ સાથે કાર્યક્રમનું સમાપન કરવામાં આવ્યું હતું.
આ ભવ્ય સમારોહે અમેરિકામાં વસતા ભારતીય સમાજની વડાપ્રધાન નરેન્દ્ર મોદી પ્રત્યેની લાગણી, ગૌરવ અને રાષ્ટ્રીય ભાવનાને વધુ મજબૂત રીતે વ્યક્ત કરી હતી.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Leave A Comment
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login