ADVERTISEMENT
ADVERTISEMENT
2025માં FBIએ 715 આતંકી હુમલા નિષ્ફળ બનાવ્યા: કાશ પટેલ
કાશ પટેલે ફરાર આરોપીઓને ચેતવણી આપી કે ગંભીર ગુનાઓમાં સંડોવાયેલા લોકોને FBI દુનિયાના કોઈપણ ખૂણેથી શોધીને અમેરિકન ન્યાય સમક્ષ લાવશે.
-
સંવાદદાતા - Thu, 06, Aug 2026
- 02:50 EDT
- 58
કાશ પટેલ / KASH PATEL VIA X
FBIના ડિરેક્ટર કાશ પટેલે જણાવ્યું છે કે એજન્સીએ ગયા વર્ષે અમેરિકાની ધરતી પર યોજાયેલા 715 આતંકવાદી હુમલાના કાવતરાઓને નિષ્ફળ બનાવ્યા હતા. તેમણે કહ્યું કે ગુપ્તચર માહિતી, અદ્યતન ટેક્નોલોજી અને વિવિધ કાયદા અમલ એજન્સીઓ સાથેના સંકલનના કારણે હુમલાઓને અમલમાં મૂકાય તે પહેલાં જ અટકાવવામાં સફળતા મળી.
સોશિયલ મીડિયા પ્લેટફોર્મ X પર કરેલી પોસ્ટમાં પટેલે કહ્યું કે તેમને FBI અને તેના એજન્ટો દ્વારા દરરોજ કરવામાં આવતા કાર્ય પર ગર્વ છે.
તેમણે કહ્યું, "દરેક અટકાવાયેલો આતંકી હુમલો એટલે એક પરિવાર સુરક્ષિત રીતે પોતાના ઘરે પરત ફરી શકે છે."
પટેલે વધુમાં જણાવ્યું, "ગયા એક વર્ષમાં FBIએ 715 આયોજિત આતંકી હુમલાઓને નિષ્ફળ બનાવ્યા છે. માત્ર છેલ્લા 30 દિવસમાં જ અમે કેલિફોર્નિયા, ટેક્સાસ, ફ્લોરિડા અને ન્યૂયોર્કમાં સમુદાયોને નિશાન બનાવનારા વધુ ચાર હુમલાઓને નિર્દોષ અમેરિકનોના જીવ જાય તે પહેલાં અટકાવ્યા."
તેમણે કહ્યું કે FBI ગુપ્તચર માહિતી, આધુનિક ટેક્નોલોજી અને ભાગીદાર એજન્સીઓ સાથેના નજીકના સંકલન દ્વારા જોખમોની ઓળખ કરીને હુમલાઓને સાકાર થાય તે પહેલાં જ રોકી રહી છે.
Every terrorist attack stopped is a family that gets to go home.
— FBI Director Kash Patel (@FBIDirectorKash) August 5, 2026
This FBI disrupted 715 planned terrorist attacks in the last year alone. In just 30 days, we stopped 4 more targeting communities in California, Texas, Florida, and New York before innocent Americans could be… pic.twitter.com/qBBbO3HRUw
અલગ પોસ્ટમાં કાશ પટેલે ફરાર આરોપીઓ અને ગંભીર ગુનાઓમાં સંડોવાયેલા લોકોને ચેતવણી આપતાં કહ્યું કે FBI દુનિયાના કોઈપણ ખૂણેથી તેમનો પીછો કરવાનું ચાલુ રાખશે.
તેમણે કહ્યું, "દેશદ્રોહીઓને ખબર હોવી જોઈએ કે તેમના માટે ક્યાંય સુરક્ષિત આશ્રય નથી. અમે તમને કોઈપણ પ્રકારનું આશ્રયસ્થાન આપીશું નહીં."
FBIની આંતરરાષ્ટ્રીય કાયદા અમલની કામગીરીનો ઉલ્લેખ કરતાં પટેલે જણાવ્યું કે જુલાઈ મહિનામાં 15થી વધુ દેશોમાંથી લગભગ 30 આરોપીઓને અમેરિકાના કબજામાં સોંપવાની કાર્યવાહી કરવામાં આવી હતી. આ આરોપીઓ પર ડ્રગ્સની હેરાફેરી, આતંકવાદ, હત્યા અને બળાત્કાર જેવા ગંભીર ગુનાઓના આરોપ છે.
તેમણે કહ્યું, "હું આજે ભાગી રહેલા તમામ આરોપીઓને કહેવા માંગું છું કે તમે હવે લાંબા સમય સુધી ફરાર રહી શકશો નહીં."
તેમણે ઉમેર્યું, "અમે તમને દુનિયાના દરેક ખૂણેથી શોધી કાઢીશું અને અમેરિકન ન્યાય સમક્ષ હાજર કરીશું."
પટેલે જણાવ્યું કે વિદેશમાંથી અમેરિકામાં પરત લાવવામાં આવેલા આરોપીઓની સંખ્યા રેકોર્ડ સ્તરે પહોંચી છે. તેમણે આ સફળતાનો શ્રેય વિદેશી સરકારો સાથેના સહકારને આપ્યો.
તેમણે કહ્યું, "આ રાષ્ટ્રપતિ ડોનાલ્ડ ટ્રમ્પના વિદેશી સરકારો સાથેના સંબંધોનું સીધું પરિણામ છે, જેના કારણે અમને એવા વિસ્તારોમાં કામ કરવાની તક મળી જ્યાં પહેલાં અમને મંજૂરી મળતી નહોતી."
We want traitors to know is that there is no safe haven. We will give you no sanctuary.
— FBI Director Kash Patel (@FBIDirectorKash) August 5, 2026
In the month of July, the FBI executed almost 30 foreign transfers of custody in over 15 separate countries for drug traffickers, terrorists, murderers, and rapists.
So what I’m here to tell… pic.twitter.com/skmrwd9ChN
પટેલે વધુમાં જણાવ્યું કે કાયદા અમલ એજન્સીઓ છેતરપિંડીનો ભોગ બનેલા લોકો, ખાસ કરીને વરિષ્ઠ નાગરિકો પાસેથી ઠગાયેલા નાણાં પરત અપાવવાના પ્રયાસો પણ કરી રહી છે.
તેમણે કહ્યું, "આરોપીઓ અમારી ન્યાય વ્યવસ્થામાં આવ્યા બાદ અમે આ નાણાં જપ્ત કર્યા છે અને હવે તે રકમ જીવનભરની બચત અને નિવૃત્તિની મૂડી ગુમાવનારા વરિષ્ઠ નાગરિકોને પરત આપવામાં આવશે."
નબળા અને સંવેદનશીલ લોકોની સુરક્ષાને કાયદા અમલ એજન્સીઓનું મુખ્ય ધ્યેય ગણાવતા પટેલે ન્યાય વિભાગ, સરકારી વકીલો, ભાગીદાર એજન્સીઓ અને વ્હાઇટ હાઉસનો સહકાર બદલ આભાર વ્યક્ત કર્યો.
તેમણે કહ્યું, "FBI અને અમારી તમામ ભાગીદાર એજન્સીઓ પોતાનું કાર્ય રોકશે નહીં," અને ફરાર આરોપીઓ અથવા ગુનેગારો વિશે માહિતી ધરાવતા લોકોને FBIની જાહેર ટિપ લાઇન પર સંપર્ક કરવાની અપીલ કરી.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Leave A Comment
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login