ADVERTISEMENT
ADVERTISEMENT
ભારતીય અબજોપતિને કુવૈતની પ્રથમ 15 વર્ષની ગોલ્ડન રેસિડન્સી
ગોલ્ડન રેસિડન્સી પાત્ર રોકાણકારો અને કુશળ વ્યક્તિઓ માટેનો લાંબા ગાળાનો નિવાસ કાર્યક્રમ છે
-
ભાવના પી. - Wed, 15, Jul 2026
- 01:58 EDT
- 29
(L-R) યુસુફ અલી એમ.એ અને શેખ ફહાદ યુસુફ સઉદ અલ-સબાહ / X/ Moi_kuw
કુવૈતે લુલુ ગ્રુપ ઇન્ટરનેશનલના ચેરમેન અને ભારતીય ઉદ્યોગપતિ તેમજ અબજોપતિ યુસુફ અલી એમ.એ.ને દેશની પ્રથમ 15 વર્ષની ગોલ્ડન રેસિડન્સી પરમિટ આપી છે.
કુવૈતની નવી શરૂ કરાયેલી ગોલ્ડન રેસિડન્સી વ્યવસ્થા હેઠળ ફર્સ્ટ ડેપ્યુટી પ્રાઇમ મિનિસ્ટર અને ગૃહમંત્રી શેખ ફહદ યુસુફ સાઉદ અલ-સબાહે આ પરમિટ એનાયત કરી હતી. આ પ્રસંગે સપોર્ટ સિક્યોરિટી સર્વિસિસના આસિસ્ટન્ટ અન્ડરસેક્રેટરી ફવાઝ અલ-રૂમી પણ ઉપસ્થિત રહ્યા હતા.
ગૃહ મંત્રાલયે જણાવ્યું કે ગોલ્ડન રેસિડન્સી પહેલ દેશની અર્થવ્યવસ્થાને ટેકો આપવા, રોકાણ માટેનું વાતાવરણ સુધારવા અને કુવૈતની રેસિડન્સી વ્યવસ્થાને આધુનિક બનાવવાની સરકારની વ્યાપક રણનીતિનો એક ભાગ છે. અધિકારીઓએ આ કાર્યક્રમને ગુણવત્તાયુક્ત રોકાણ અને મૂડી આકર્ષવાની દિશામાં એક વ્યૂહાત્મક પગલું ગણાવ્યું છે. સાથે જ દેશની લાંબા ગાળાની વિકાસ યોજનાઓને અનુરૂપ કુવૈતને પ્રાદેશિક આર્થિક કેન્દ્ર તરીકે વધુ મજબૂત બનાવવાનો પણ તેનો ઉદ્દેશ છે.
શેખ ફહદે જણાવ્યું કે રેસિડન્સી કાર્યક્રમ કુવૈતમાં કાનૂની અને વહીવટી વ્યવસ્થા પ્રત્યે વિશ્વાસ મજબૂત કરીને સ્થિર અને રોકાણને અનુકૂળ વાતાવરણ ઊભું કરવાની દેશની દૃષ્ટિને પ્રતિબિંબિત કરે છે. તેમણે કહ્યું કે આ પહેલ લાંબા ગાળાના રોકાણને પ્રોત્સાહન આપીને અને વિકાસની તકોનો વિસ્તાર કરીને ટકાઉ આર્થિક વૃદ્ધિમાં યોગદાન આપશે.
મંત્રીએ વધુમાં જણાવ્યું કે ગૃહ મંત્રાલયે કુવૈત ડાયરેક્ટ ઇન્વેસ્ટમેન્ટ પ્રમોશન ઓથોરિટી અને પબ્લિક ઓથોરિટી ફોર સિવિલ ઇન્ફોર્મેશન સાથે સંકલન કરીને સ્પષ્ટ નિયમો અને આંતરરાષ્ટ્રીય શ્રેષ્ઠ પ્રથાઓને અનુરૂપ ધોરણો પર આધારિત એક સંકલિત ગોલ્ડન રેસિડન્સી સિસ્ટમ વિકસાવી છે. તેમના જણાવ્યા અનુસાર આ માળખું સરળ અને ઝડપી પ્રક્રિયાની સાથે કાનૂની તથા નિયમનકારી જરૂરિયાતોના પાલન વચ્ચે સંતુલન જાળવે છે.
શેખ ફહદે એમ પણ જણાવ્યું કે ગૃહ મંત્રાલય સતત વહીવટી સુધારાઓ દ્વારા રોકાણકારો માટેની સેવાઓ વધુ સારી બનાવવા પ્રતિબદ્ધ છે. આ સુધારાઓ કુવૈતની આધુનિક છબીને પ્રતિબિંબિત કરવાની સાથે રોકાણકારોમાં વિશ્વાસ અને સ્થિરતા વધારવામાં મદદ કરશે.
મંત્રાલયે જણાવ્યું કે પ્રથમ 15 વર્ષની ગોલ્ડન રેસિડન્સી એનાયત કરવી એ ખાનગી ક્ષેત્ર સાથેની ભાગીદારીને સમર્થન આપવાની કુવૈતની પ્રતિબદ્ધતાને દર્શાવે છે. તેનો હેતુ રોકાણકારોને સુરક્ષિત અને સ્થિર વાતાવરણમાં કાર્ય કરવા માટે સક્ષમ બનાવવાનો છે. સાથે જ બદલાતી આર્થિક અને વિકાસલક્ષી પ્રાથમિકતાઓને અનુરૂપ નિયમો અને પ્રક્રિયાઓને સતત અપડેટ કરવામાં આવશે.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Leave A Comment
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login