યુએસ સેનેટર એડમ શિફ / X/@SenAdamSchiff

અમેરિકાના 40થી વધુ સાંસદોના ગઠબંધને ટ્રમ્પ પ્રશાસનને કેન્દ્ર સરકારની ગ્રાન્ટ સંબંધિત પ્રસ્તાવિત નવી નિયમાવલી પાછી ખેંચવાની અપીલ કરી છે. સાંસદોએ ચેતવણી આપી છે કે આ નિયમ વૈજ્ઞાનિક સંશોધન માટેની ગ્રાન્ટ ફાળવણીમાં રાજકીય હસ્તક્ષેપ વધારશે, અમેરિકાની નવીનતા ક્ષમતાને નબળી પાડશે અને ચીન જેવા દેશો સામેની વૈશ્વિક સ્પર્ધામાં દેશને પાછળ ધકેલી દેશે.

કેલિફોર્નિયાના સેનેટર એડમ શિફ તેમજ પ્રતિનિધિસભાના સભ્યો ઝોય લોફગ્રેન અને સલુદ કાર્બાજલના નેતૃત્વ હેઠળના સાંસદોએ ઓફિસ ઓફ મેનેજમેન્ટ એન્ડ બજેટ (OMB)ના ડિરેક્ટર રસેલ વોટને લખેલા પત્રમાં જણાવ્યું છે કે "રેગ્યુલેશન ફોર ફેડરલ ફાઇનાન્સિયલ આસિસ્ટન્સ" નામનો પ્રસ્તાવિત નિયમ કેન્દ્ર સરકારની સંશોધન ગ્રાન્ટ આપવાની પદ્ધતિમાં મૂળભૂત ફેરફાર લાવશે. તેમના કહેવા મુજબ આ નિયમ રાજકીય નિમણૂક ધરાવતા અધિકારીઓને ગ્રાન્ટની સમીક્ષા પ્રક્રિયા પર વધુ નિયંત્રણ આપશે.

સાંસદોએ પત્રમાં લખ્યું છે કે, "આ નિયમ અભૂતપૂર્વ છે, તેનો વ્યાપ ખૂબ મોટો છે અને તે સમગ્ર કેન્દ્ર સરકારની દરેક એવી એજન્સી પર લાગુ પડશે જે ગ્રાન્ટ અથવા અન્ય આર્થિક સહાયના પ્રસ્તાવોનું મૂલ્યાંકન કરે છે. આ નિયમ રાજકીય નિમણૂક ધરાવતા અધિકારીઓને ગ્રાન્ટ સમીક્ષાની દરેક પ્રક્રિયા પર નિયંત્રણ આપશે, જેના કારણે લોકોના હિત કરતાં રાષ્ટ્રપતિની રાજકીય પસંદગીને વધુ મહત્વ મળવાની શક્યતા રહેશે."

સાંસદોએ જણાવ્યું કે કેલિફોર્નિયા દેશના સૌથી મોટા સંઘીય સંશોધન અનુદાન મેળવનારા રાજ્યોમાંનું એક છે અને અહીં વિશ્વની અગ્રણી યુનિવર્સિટીઓ તથા ટેક્નોલોજી કંપનીઓ આવેલી હોવાથી આ રાજ્ય પર તેની સૌથી વધુ અસર પડશે. તેમણે ભારપૂર્વક જણાવ્યું કે છેલ્લા 75 વર્ષથી ગુણવત્તા આધારિત અને સ્વતંત્ર વૈજ્ઞાનિક સમીક્ષા પ્રક્રિયાના કારણે જ અમેરિકા દવા, એન્જિનિયરિંગ, રાષ્ટ્રીય સુરક્ષા અને ટેક્નોલોજી ક્ષેત્રે અગ્રેસર રહ્યું છે.

તેમણે જણાવ્યું કે, "વૈજ્ઞાનિક સંશોધન માટેની સરકારી ફંડિંગ સ્વતંત્ર રહેવી અત્યંત જરૂરી છે." તેમણે OMBને અપીલ કરી કે ગ્રાન્ટ આપવાની પ્રક્રિયામાં નિષ્પક્ષતા, કડક માપદંડ અને પારદર્શિતા જાળવી રાખવામાં આવે જેથી તેમાં કોઈ રાજકીય પક્ષપાત કે રાજકીય એજન્ડાનો પ્રભાવ ન પડે.

પત્રમાં ચેતવણી આપવામાં આવી છે કે જો નિષ્ણાતોની 'પિયર રિવ્યૂ' પદ્ધતિને બદલે રાજકીય દેખરેખને મહત્વ આપવામાં આવશે તો અનેક ક્ષેત્રોમાં વૈજ્ઞાનિક પ્રગતિ ધીમી પડી જશે.

સાંસદોના જણાવ્યા મુજબ આ નિયમ પ્રાયોગિક સંશોધનના વૈજ્ઞાનિક પાયાને નબળો પાડશે, જેના કારણે નવી સારવાર, પર્યાવરણ સંરક્ષણની વ્યૂહરચનાઓ, અવકાશ અંગેના જ્ઞાનને વિસ્તૃત કરતી ટેક્નોલોજી અને મહત્વપૂર્ણ વૈજ્ઞાનિક પ્રશ્નોના ઉકેલો શોધવાની પ્રક્રિયા ધીમી પડશે.

તેમણે વધુમાં જણાવ્યું કે આ પ્રસ્તાવ અમેરિકાની વૈશ્વિક સ્પર્ધાત્મકતા પર પણ નકારાત્મક અસર કરશે. STEM (સાયન્સ, ટેક્નોલોજી, એન્જિનિયરિંગ અને મેથેમેટિક્સ) ક્ષેત્રમાં પ્રતિભાશાળી વિદ્યાર્થીઓ અને સંશોધકોની સંખ્યા ઘટી શકે છે તેમજ યુનિવર્સિટીઓ, સંશોધન સંસ્થાઓ અને કંપનીઓ માટે આંતરરાષ્ટ્રીય પ્રતિભાને આકર્ષવી વધુ મુશ્કેલ બનશે.

સાંસદોએ ચેતવણી આપી કે જ્યારે ચીન વૈજ્ઞાનિક સંશોધનમાં સતત વધુ રોકાણ કરી રહ્યું છે ત્યારે આ નિયમના કારણે ટેક્નિકલ નિષ્ણાતી ન ધરાવતા રાજકીય અધિકારીઓને NASA સહિતની સંઘીય વૈજ્ઞાનિક એજન્સીઓના નિર્ણયો પર અસર કરવાનો અધિકાર મળી શકે છે.

પત્રમાં વધુમાં જણાવાયું છે કે "રાષ્ટ્રીય હિત" જેવા વ્યાપક કારણો દર્શાવીને જો સંશોધન ગ્રાન્ટ બંધ કરવામાં આવશે તો બાયોમેડિકલ સંશોધનને ગંભીર નુકસાન થઈ શકે છે. તેના કારણે કેન્સર, અલ્ઝાઇમર, હૃદયરોગ, ચેપી રોગો સહિત અનેક ગંભીર બીમારીઓ અંગેનું સંશોધન વિલંબિત થઈ શકે છે, લાંબા ગાળાના ક્લિનિકલ ટ્રાયલ્સ ખોરવાઈ શકે છે અને અગાઉ કરાયેલ સરકારી રોકાણ પણ વ્યર્થ જઈ શકે છે.

સાંસદોએ એ પણ ચિંતા વ્યક્ત કરી કે આ નિયમના કારણે યુનિવર્સિટીઓ માટે સંશોધન પ્રકાશનના ખર્ચ તેમજ સંશોધનના વિષયો અંગે પણ નવી મર્યાદાઓ ઊભી થઈ શકે છે.

પત્રના અંતમાં સાંસદોએ જણાવ્યું કે, "આ નિયમની અસર આવનારી અનેક પેઢીઓ સુધી જોવા મળી શકે છે. ફંડિંગમાં આવી અનિશ્ચિતતા અને અસ્થિરતાના કારણે કેલિફોર્નિયા તેમજ સમગ્ર અમેરિકા આરોગ્ય, નવીનતા, સંશોધન અને વૈજ્ઞાનિક વિકાસ જેવા ક્ષેત્રોમાં અન્ય દેશો કરતાં પાછળ રહી જશે. તેથી અમે આપને આ પ્રસ્તાવિત નિયમ તાત્કાલિક પાછો ખેંચવાની મજબૂત અપીલ કરીએ છીએ."

અમેરિકામાં સંઘીય સંશોધન માટેની ગ્રાન્ટ વ્યવસ્થા લાંબા સમયથી દેશની વૈજ્ઞાનિક પ્રગતિનો મહત્વપૂર્ણ આધારસ્તંભ રહી છે. તેના માધ્યમથી યુનિવર્સિટીઓ, રાષ્ટ્રીય પ્રયોગશાળાઓ અને ખાનગી ક્ષેત્ર વચ્ચે ભાગીદારીને પ્રોત્સાહન મળ્યું છે, જેના પરિણામે દવા, એરોસ્પેસ, કમ્પ્યુટિંગ અને સ્વચ્છ ઊર્જા જેવા ક્ષેત્રોમાં અનેક મહત્વપૂર્ણ શોધો અને નવીનતાઓ શક્ય બની છે. સંશોધન સંસ્થાઓ અને ટેક્નોલોજી કંપનીઓની મોટી સંખ્યાને કારણે કેલિફોર્નિયાને દર વર્ષે સંઘીય સંશોધન ગ્રાન્ટનો સૌથી મોટો હિસ્સો મળતો રહ્યો છે.

ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"