USCIS / AMERICAN IMMIGRATION COUNCIL

અમેરિકાની યુએસ સિટિઝનશિપ એન્ડ ઇમિગ્રેશન સર્વિસિસ (USCIS)માં પેન્ડિંગ અરજીઓ અને પિટિશનોની સંખ્યા ઐતિહાસિક સ્તરે પહોંચી ગઈ છે. અમેરિકન ઇમિગ્રેશન કાઉન્સિલના તાજેતરના આંકડા મુજબ, હાલમાં કુલ 1.13 કરોડ (11.3 મિલિયન) અરજીઓ અને પિટિશનો નિર્ણયની રાહ જોઈ રહી છે.

5 ઓગસ્ટે જાહેર કરાયેલા નાણાકીય વર્ષ 2026ના આંકડા મુજબ, ઇમિગ્રેશન પ્રક્રિયામાં વ્યાપક ધીમાપો જોવા મળી રહ્યો છે. અરજીઓનું નિરાકરણ ઓછું થઈ રહ્યું છે, પેન્ડિંગ કેસોમાં સતત વધારો થઈ રહ્યો છે, નામંજૂરીનો દર વધી રહ્યો છે અને અરજદારોને નિર્ણય માટે પહેલાં કરતાં વધુ સમય રાહ જોવી પડી રહી છે.

FY2025ના પ્રથમ ત્રિમાસિક ગાળાની સરખામણીએ FY2026ના પ્રથમ ત્રિમાસિકમાં પેન્ડિંગ કેસોમાં 16.5 ટકાનો વધારો નોંધાયો છે. એક વર્ષ પહેલાં 97 લાખ (9.7 મિલિયન) કેસ પેન્ડિંગ હતા, જે વધીને હવે 1.13 કરોડ (11.3 મિલિયન) થઈ ગયા છે.

અમેરિકન ઇમિગ્રેશન કાઉન્સિલ 1987માં સ્થાપિત થયેલી વોશિંગ્ટન ડી.સી. સ્થિત બિનનફાકારક સંસ્થા છે, જે સંશોધન, નીતિ વિશ્લેષણ અને કાનૂની કાર્યવાહી દ્વારા અમેરિકાની ઇમિગ્રેશન વ્યવસ્થામાં સુધારા માટે કાર્ય કરે છે.

રિપોર્ટ મુજબ, FY2026ના પ્રથમ ત્રિમાસિક દરમિયાન USCISને ગયા વર્ષની સરખામણીએ 33.6 ટકા ઓછી અરજીઓ મળી હતી, જ્યારે પૂર્ણ કરાયેલા કેસોમાં 40.8 ટકાનો ઘટાડો નોંધાયો હતો. એટલે કે અરજીઓ ઓછી હોવા છતાં પ્રક્રિયામાં વધુ વિલંબ થઈ રહ્યો છે.

આ ઉપરાંત, FY2026ના પ્રથમ ત્રિમાસિકમાં USCISએ જેટલી અરજીઓ પ્રાપ્ત કરી હતી, તેનાથી ઓછી અરજીઓનું નિરાકરણ કર્યું હતું. સતત 11મા ત્રિમાસિકમાં એજન્સીનો કાર્યક્ષમતા ગુણોત્તર (Efficiency Ratio) 1થી નીચે રહ્યો છે.

વિવિધ ઇમિગ્રેશન કેટેગરીમાં પેન્ડિંગ કેસોમાં નોંધપાત્ર વધારો જોવા મળ્યો છે. ખાસ કરીને વર્ક ઓથોરાઇઝેશન (Employment Authorization Document - EAD) માટેની Form I-765ની પેન્ડિંગ અરજીઓમાં 4,46,650 કેસનો એટલે કે 38 ટકાનો વધારો નોંધાયો છે.

એડજસ્ટમેન્ટ ઑફ સ્ટેટસ માટે અરજી કરનારા લાભાર્થીઓની વર્ક પરમિટ અરજીઓ લગભગ ત્રણગણી થઈ ગઈ છે. FY2025ના પ્રથમ ત્રિમાસિકમાં 1,54,469 પેન્ડિંગ અરજીઓ હતી, જે FY2026ના પ્રથમ ત્રિમાસિકમાં વધીને 4,61,884 થઈ ગઈ છે.

બંને વર્ષમાં મળેલી અરજીઓની સંખ્યા લગભગ સમાન રહી હોવા છતાં, પૂર્ણ કરાયેલા કેસોની સંખ્યા 1,70,256થી ઘટીને માત્ર 86,756 રહી ગઈ છે. પરિણામે કાર્યક્ષમતા ગુણોત્તર 1.04થી ઘટીને 0.53 થયો છે.

શરણાર્થીઓ દ્વારા દાખલ કરાતી Form I-485 (Adjustment of Status)માં સ્થિતિ વધુ ગંભીર રહી છે. અરજીઓની સંખ્યા 16,725થી વધીને 25,746 થઈ હતી, પરંતુ પૂર્ણ થયેલા કેસો 17,756થી ઘટીને માત્ર 3,536 રહ્યા. કાર્યક્ષમતા ગુણોત્તર 1.06થી ઘટીને માત્ર 0.14 રહ્યો, એટલે કે દર 100 અરજીઓ સામે માત્ર 14 અરજીઓનો જ નિકાલ થયો.

અરજીઓના નિર્ણય માટેનો સરેરાશ સમય પણ નોંધપાત્ર રીતે વધી ગયો છે. FY2025ના પ્રથમ ત્રિમાસિકમાં સરેરાશ બેકલોગ ક્લિયર થવામાં 9.4 મહિના લાગતા હતા, જ્યારે FY2026ના પ્રથમ ત્રિમાસિકમાં આ સમય વધીને 18.6 મહિના થયો છે.

કેલેન્ડર વર્ષના સરેરાશ મુજબ પણ બેકલોગ ક્લિયરન્સ સમય 2024ના 8.9 મહિનાથી વધીને 2025માં 14.4 મહિના થયો છે, જે 61.8 ટકાનો વધારો દર્શાવે છે.

કેટલીક અરજીઓમાં રાહ જોવાનો સમય ખૂબ જ વધી ગયો છે. આશ્રય (Asylee) આધારિત Form I-485 માટેનો સરેરાશ ક્લિયરન્સ સમય 7.7 મહિનાથી વધીને 70.6 મહિના થયો છે, એટલે કે આઠ ગણાથી પણ વધુ વધારો નોંધાયો છે.

રિપોર્ટમાં એ પણ જણાવાયું છે કે વિવિધ ઇમિગ્રેશન અરજીઓ અને પિટિશનોમાં નામંજૂરીનો દર પણ વધ્યો છે. કુલ નામંજૂરી દર 8.9 ટકાથી વધીને 12.2 ટકા થયો છે, જે દર્શાવે છે કે અરજદારો માટે મંજૂરી મેળવવી અગાઉ કરતાં વધુ મુશ્કેલ બની રહી છે.

રોજગાર આધારિત ગ્રીન કાર્ડ કેટેગરીમાં પણ નામંજૂરીમાં નોંધપાત્ર વધારો થયો છે. EB-1 કેટેગરીમાં કુલ નામંજૂરી દર 13.9 ટકાથી વધીને 30.1 ટકા થયો છે. આ કેટેગરીમાં અત્યંત કુશળ વ્યાવસાયિકો, સંશોધકો, ડૉક્ટરો, ઉદ્યોગસાહસિકો અને અસાધારણ પ્રતિભા ધરાવતા લોકોનો સમાવેશ થાય છે.

EB-1A Extraordinary Ability પિટિશનમાં નામંજૂરી દર 25.3 ટકાથી વધીને 52.5 ટકા થયો છે. જ્યારે EB-2 National Interest Waiver (NIW) પિટિશનમાં નામંજૂરી દર 37.3 ટકાથી વધીને 57.4 ટકા થયો છે.

માનવતાવાદી પેરોલ (Humanitarian Parole) અરજીઓમાં પણ નામંજૂરીનો દર નોંધપાત્ર રીતે વધ્યો છે. FY2025ના પ્રથમ ત્રિમાસિકમાં 52.9 ટકા અરજીઓ નામંજૂર થતી હતી, જે FY2026ના પ્રથમ ત્રિમાસિકમાં વધીને 88.7 ટકા થઈ ગઈ છે.

તે ઉપરાંત Parole-in-Place અરજીઓમાં નામંજૂરી દર 18.4 ટકાથી વધીને 45.8 ટકા અને Advance Parole અરજીઓમાં 29.9 ટકાથી વધીને 46.7 ટકા થયો છે.

અમેરિકન ઇમિગ્રેશન કાઉન્સિલના જણાવ્યા મુજબ, આ માત્ર એક ત્રિમાસિકનો ટ્રેન્ડ નથી. 2024 અને 2025ના વાર્ષિક સરેરાશ આંકડા પણ દર્શાવે છે કે અરજીઓનું પ્રોસેસિંગ ધીમું પડ્યું છે, પેન્ડિંગ કેસોમાં વધારો થયો છે, નિર્ણયમાં વધુ સમય લાગી રહ્યો છે અને નામંજૂરીનો દર સતત વધી રહ્યો છે.

સંસ્થાએ જણાવ્યું છે કે તેની USCIS Immigration Filing Trends ડેશબોર્ડ દ્વારા આગામી સમયમાં પણ આ તમામ આંકડાઓ પર સતત નજર રાખવામાં આવશે, જેથી નીતિ નિર્માતાઓ, સંશોધકો અને સામાન્ય લોકોને અમેરિકાની ઇમિગ્રેશન પ્રક્રિયામાં થતા ફેરફારો અંગે સમયસર માહિતી મળી રહે.

ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"