ADVERTISEMENT
ADVERTISEMENT
વ્હાઇટ હાઉસ નજીક ફાયરિંગ: સિક્રેટ સર્વિસે હુમલાખોરને ઠાર માર્યો
સિક્રેટ સર્વિસે જણાવ્યું કે અધિકારીઓએ જવાબી કાર્યવાહી કરતા શંકાસ્પદ વ્યક્તિને ગોળી મારી હતી, જેને હોસ્પિટલ ખસેડાયા બાદ મૃત જાહેર કરવામાં આવ્યો.
-
IANS(ગુજરાતી) - Sun, 24, May 2026
- 04:13 EDT
- 34
પ્રતીકાત્મક તસ્વીર / IANS
23 મેની સાંજે વ્હાઇટ હાઉસ નજીક ગોળીબાર કરનાર એક હુમલાખોરને અમેરિકાની સિક્રેટ સર્વિસના અધિકારીઓએ જવાબી કાર્યવાહીમાં ઠાર મારી દીધો હતો. અધિકારીઓએ જણાવ્યું કે આ ઘટના વ્હાઇટ હાઉસ એક્ઝિક્યુટિવ કોમ્પ્લેક્સ નજીક બની હતી.
આ ઘટનામાં એક રાહદારીએ પણ ગોળી વાગવાથી ઇજા પહોંચી હતી. તે સમયે અમેરિકાના રાષ્ટ્રપતિ ડોનાલ્ડ ટ્રમ્પ વ્હાઇટ હાઉસમાં હાજર હતા, પરંતુ તેમને કોઈ ઈજા પહોંચી નહોતી.
સાંજે લગભગ 6 વાગ્યા પછી 17મી સ્ટ્રીટ અને પેન્સિલવેનિયા એવન્યૂ NW નજીક, વ્હાઇટ હાઉસ અને આઇઝનહાવર એક્ઝિક્યુટિવ ઓફિસ બિલ્ડિંગ પાસે આ ઘટના બની હતી.
સિક્રેટ સર્વિસના ચીફ ઓફ કમ્યુનિકેશન્સ એન્થની ગુગ્લિયેલ્મીએ જણાવ્યું કે, "23 મેના રોજ સાંજે લગભગ 6 વાગ્યા બાદ એક વ્યક્તિએ પોતાની બેગમાંથી હથિયાર કાઢીને ગોળીબાર શરૂ કર્યો હતો."
સિક્રેટ સર્વિસે પોતાના નિવેદનમાં જણાવ્યું કે, "અધિકારીઓએ જવાબી ગોળીબાર કર્યો અને શંકાસ્પદ વ્યક્તિને ગોળી વાગી હતી. તેને નજીકની હોસ્પિટલમાં લઈ જવામાં આવ્યો, જ્યાં તેને મૃત જાહેર કરવામાં આવ્યો."
નિવેદનમાં વધુમાં કહેવામાં આવ્યું કે, "આ ગોળીબારમાં એક રાહદારીને પણ ગોળી વાગી હતી. જોકે કોઈ અધિકારીને ઈજા પહોંચી નહોતી."
અધિકારીઓએ હુમલાખોરની ઓળખ જાહેર કરી નથી અને હુમલાનું કારણ પણ જણાવ્યું નથી. સિક્રેટ સર્વિસે રાહદારીની સ્થિતિ વિશે કોઈ માહિતી આપી નહોતી, જોકે CNNના અહેવાલ અનુસાર તેની સ્થિતિ ગંભીર હોવાનું કહેવાયું છે.
સિક્રેટ સર્વિસે જણાવ્યું કે ઘટના સમયે ટ્રમ્પ વ્હાઇટ હાઉસમાં જ હતા. "આ ઘટનાથી રાષ્ટ્રપતિની સુરક્ષા અથવા અન્ય કામગીરી પર કોઈ અસર પડી નહોતી," એમ નિવેદનમાં જણાવાયું.
ઘટના બાદ વ્હાઇટ હાઉસ કોમ્પ્લેક્સને થોડા સમય માટે લોકડાઉન કરવામાં આવ્યો હતો. સશસ્ત્ર સિક્રેટ સર્વિસ કર્મચારીઓ નોર્થ લોન વિસ્તારમાં તૈનાત થયા હતા અને મીડિયા કર્મચારીઓ તથા સ્ટાફને પ્રેસ બ્રીફિંગ રૂમમાં લઈ જવામાં આવ્યા હતા.
CNNના જણાવ્યા મુજબ, સ્થળ પર હાજર પત્રકારોને સુરક્ષિત સ્થળે રહેવા સૂચના આપવામાં આવી હતી, જ્યારે અધિકારીઓ "નીચે બેસી જાઓ" અને "ગોળીબાર થઈ રહ્યો છે" કહીને ચેતવણી આપી રહ્યા હતા.
ઘટનાસ્થળ નજીક હાજર પત્રકારોએ સતત ગોળીબારના અવાજો સાંભળ્યા હોવાનું જણાવ્યું હતું. ધ ન્યૂયોર્ક ટાઇમ્સની ફોટોગ્રાફર એલિસન રોબર્ટે જણાવ્યું કે પ્રેસ રૂમની બહારથી લગભગ "20 થી 30 ગોળીઓના અવાજ" સંભળાયા હતા.
ABC ન્યૂઝની પ્રતિનિધિ સેલિના વાંગે પણ ઘટનાની ક્ષણો વિશે જણાવ્યું કે, "હું વ્હાઇટ હાઉસના નોર્થ લોન પર સોશિયલ મીડિયા માટે વીડિયો બનાવી રહી હતી ત્યારે ગોળીબાર શરૂ થયો. તે અનેક ગોળીઓના અવાજ જેવો લાગતો હતો. ત્યારબાદ અમને તરત જ પ્રેસ બ્રીફિંગ રૂમમાં દોડવા માટે કહેવામાં આવ્યું."
FBIના ડિરેક્ટર કાશ પટેલે જણાવ્યું કે એજન્સી પણ તપાસમાં સહયોગ આપી રહી છે.
સિક્રેટ સર્વિસે જણાવ્યું કે સમગ્ર ઘટનાની તપાસ ચાલુ છે અને વધુ માહિતી બાદમાં જાહેર કરવામાં આવશે. ઘટનાના પગલે FBI, મેટ્રોપોલિટન પોલીસ વિભાગ અને નેશનલ ગાર્ડ સહિત અનેક સુરક્ષા એજન્સીઓ સ્થળ પર પહોંચી હતી અને વ્હાઇટ હાઉસ આસપાસના રસ્તાઓને કલાકો સુધી બંધ રાખવામાં આવ્યા હતા.
આ ઘટના એક મહિના કરતાં ઓછા સમયમાં વ્હાઇટ હાઉસ નજીક થયેલી બીજી ગોળીબારની ઘટના છે. અગાઉ પણ વ્હાઇટ હાઉસ કરસ્પોન્ડન્ટ્સ એસોસિએશન ડિનર દરમિયાન ગોળીબારની ઘટનાથી કાર્યક્રમમાં વિક્ષેપ પડ્યો હતો.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Leave A Comment
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login