ADVERTISEMENT
ADVERTISEMENT
ટ્રમ્પ-મોદી મુલાકાતથી ભારત-અમેરિકા સંબંધો નવી ઊંચાઈએ પહોંચશે: વ્હાઇટ હાઉસ
જી-7 સમિટ દરમિયાન ટ્રમ્પ અને વડાપ્રધાન મોદી વચ્ચે દ્વિપક્ષીય બેઠક યોજાશે.
-
IANS(ગુજરાતી) - Wed, 17, Jun 2026
- 04:01 EDT
- 53
રાષ્ટ્રપતિ ડોનાલ્ડ ટ્રમ્પ સાથે પીએમ મોદી / IANS
અમેરિકાના રાષ્ટ્રપતિ ડોનાલ્ડ ટ્રમ્પ અને વડાપ્રધાન નરેન્દ્ર મોદી વચ્ચે ફ્રાન્સના એવિયન શહેરમાં યોજાનારી બેઠક ભારત-અમેરિકા સંબંધોને "નવી ઊંચાઈઓ" પર લઈ જશે, એવો વિશ્વાસ વ્હાઇટ હાઉસે વ્યક્ત કર્યો છે. બંને નેતાઓ વચ્ચે વેપાર, ટેક્નોલોજી, રોકાણ અને વૈશ્વિક સુરક્ષા જેવા મહત્વના મુદ્દાઓ પર ચર્ચા થવાની સંભાવના છે.
વ્હાઇટ હાઉસના પ્રવક્તા કુશ દેસાઈએ IANSને જણાવ્યું કે, "રાષ્ટ્રપતિ ટ્રમ્પ અને વડાપ્રધાન મોદી વચ્ચે ગાઢ મિત્રતા છે અને તેમના નેતૃત્વ હેઠળ અમેરિકા અને ભારત બંને દેશો વચ્ચેના સંબંધો નવી ઊંચાઈએ પહોંચશે."
જી-7 સમિટના અવસરે યોજાનારી આ બેઠક ગયા વર્ષે ફેબ્રુઆરીમાં થયેલી શિખર બેઠક બાદ બંને નેતાઓની પ્રથમ રૂબરૂ મુલાકાત હશે. આ બેઠક એવા સમયે થઈ રહી છે જ્યારે બંને દેશો વચ્ચે સંભવિત વેપાર કરાર અંગે ચર્ચાઓ ચાલી રહી છે અને પશ્ચિમ એશિયાની પરિસ્થિતિને લઈને રાજદ્વારી પ્રયાસો પણ ચાલુ છે.
વ્હાઇટ હાઉસના જણાવ્યા મુજબ બેઠક દરમિયાન આર્થિક વિકાસ, સપ્લાય ચેઇન, આર્ટિફિશિયલ ઇન્ટેલિજન્સ (AI), રોકાણ ભાગીદારી અને વિવિધ વૈશ્વિક સુરક્ષા પડકારો અંગે ચર્ચા થશે.
કુશ દેસાઈએ જણાવ્યું કે, "રાષ્ટ્રપતિ ટ્રમ્પે હંમેશા ભારત સાથેની અમેરિકાની વ્યૂહાત્મક ભાગીદારીને સમર્થન આપ્યું છે." તેમણે ઉમેર્યું કે અમેરિકાના વિદેશ મંત્રી માર્કો રૂબિયોની તાજેતરની ભારત મુલાકાતે વેપાર અને રાષ્ટ્રીય સુરક્ષા ક્ષેત્રે સહકાર વધુ મજબૂત બનાવવાના પ્રયાસોને આગળ વધાર્યા છે.
તેમણે જણાવ્યું કે રૂબિયોની ભારત મુલાકાત દરમિયાન મહત્વપૂર્ણ ખનિજ (Critical Minerals) ક્ષેત્રે ઐતિહાસિક સમજૂતી કરાર (MOU) પર હસ્તાક્ષર કરવામાં આવ્યા હતા.
નિષ્ણાતોનું માનવું છે કે બંને દેશો આ બેઠકમાંથી સ્પષ્ટ પરિણામો અને મજબૂત રાજકીય સંદેશાની અપેક્ષા રાખી રહ્યા છે.
હડસન ઇન્સ્ટિટ્યૂટની સિનિયર ફેલો અપર્ણા પાંડેએ જણાવ્યું કે, "આ બેઠકને લઈને બંને દેશોમાં ઊંચી અપેક્ષાઓ છે. પશ્ચિમ એશિયાની પરિસ્થિતિમાં સુધારાની શક્યતાઓ અને વેપાર કરાર અંગેની ચર્ચાઓ વચ્ચે આ મુલાકાત મહત્વપૂર્ણ બની છે."
તેમણે કહ્યું કે બેઠકનું પ્રતીકાત્મક મહત્વ તેમજ વાસ્તવિક પરિણામો બંને મહત્વના રહેશે.
"બંને નેતાઓ દુનિયાને બતાવવા માંગશે કે પડકારો હોવા છતાં બંને લોકશાહી દેશો વચ્ચેના સંબંધો મજબૂત છે. સાથે જ સંરક્ષણ અને ટેક્નોલોજી ક્ષેત્રે કેટલાક નવા કરારોની જાહેરાત પણ થઈ શકે છે," તેમણે ઉમેર્યું.
અલબ્રાઇટ સ્ટોનબ્રિજ ગ્રુપના નોર્થ અમેરિકા પાર્ટનર આત્મન ત્રિવેદીએ જણાવ્યું કે આ બેઠક દ્વિપક્ષીય સંબંધોમાં નવી ગતિ લાવવાની મહત્વપૂર્ણ તક છે.
તેમણે કહ્યું, "ગલ્ફ ઓફ ઓમાનમાં ભારતીય નાવિકોના મોત બાદ બંને દેશો વચ્ચેના સંબંધોને નવી દિશા આપવા માટે આ બેઠક શ્રેષ્ઠ તક બની શકે છે."
જો કે તેમણે ચેતવણી આપી કે મોટા નિર્ણયો અથવા મોટી જાહેરાતોની અપેક્ષા રાખવી યોગ્ય નહીં હોય.
"બંને નેતાઓ ઊર્જા, સંરક્ષણ અને ટેક્નોલોજી ક્ષેત્રે લાંબા ગાળાના સહકારની મહત્વતા પર ભાર મૂકશે. ઉપરાંત, વચગાળાના વેપાર કરારને આગળ વધારવા અને આગામી એક-બે મહિનામાં સમજૂતી સુધી પહોંચવા માટે વાટાઘાટકારોને પ્રોત્સાહન આપતું સકારાત્મક સંયુક્ત નિવેદન પણ આવી શકે છે," તેમણે જણાવ્યું.
આ પહેલા, મંગળવારે જી-7 સમિટની "નવી ભાગીદારીઓ અને વૈશ્વિક એકતા પુનઃસ્થાપિત કરવા" વિષયક બેઠક દરમિયાન ટ્રમ્પ અને મોદીએ એકબીજાનું અભિવાદન કર્યું હતું.
બંને નેતાઓએ હાથ મિલાવ્યા હતા અને ટૂંકી ચર્ચા પણ કરી હતી. આ બેઠકમાં જી-7 દેશો ઉપરાંત ભાગીદાર દેશો, વિશ્વ બેંક અને આફ્રિકન ડેવલપમેન્ટ બેંકના પ્રતિનિધિઓ પણ હાજર હતા.
એવિયન પહોંચ્યા બાદ વડાપ્રધાન મોદીએ જણાવ્યું હતું કે તેઓ વૈશ્વિક મહત્વના મુદ્દાઓ પર વિશ્વના નેતાઓ સાથે ચર્ચા કરવા આતુર છે.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Leave A Comment
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login