ADVERTISEMENT
ADVERTISEMENT
ટ્રમ્પની H-1B પરની $100,000 ફી અમેરિકી કોર્ટે રદ કરી
જજે કહ્યું કે ઇમિગ્રેશન કાયદા હેઠળ મળતી રાષ્ટ્રપતિની સત્તાઓના આધારે આવી ફી લાદી શકાય નહીં અને કોંગ્રેસની મંજૂરી વિના કર વસૂલવાનો અધિકાર નથી.
-
IANS(ગુજરાતી) - Tue, 09, Jun 2026
- 05:36 EDT
- 71
ડોનાલ્ડ ટ્રમ્પ(ફાઈલ ફોટો) / REUTERS/Evan Vucci/File Photo
અમેરિકાની એક ફેડરલ કોર્ટે રાષ્ટ્રપતિ ડોનાલ્ડ ટ્રમ્પ દ્વારા H-1B વિઝાની નવી અરજીઓ પર લાદવામાં આવેલી વિવાદાસ્પદ 1 લાખ ડોલરની ફી રદ કરી દીધી છે. કોર્ટે જણાવ્યું કે આ નિર્ણય દ્વારા પ્રશાસને પોતાની કાનૂની સત્તાની મર્યાદા ઓળંગી હતી અને કોંગ્રેસની મંજૂરી વિના ગેરકાયદેસર રીતે કર લાદવાનો પ્રયાસ કર્યો હતો.
મેસાચ્યુસેટ્સના યુએસ ડિસ્ટ્રિક્ટ જજ લિઓ ટી. સોરોકિન એ આ નીતિ સામે અરજી કરનાર 20 રાજ્યોના ગઠબંધનની તરફેણમાં ચુકાદો આપ્યો અને સમગ્ર દેશમાં આ નીતિને અમાન્ય જાહેર કરી.
જજે પોતાના ચુકાદામાં લખ્યું કે, "આ નીતિ H-1B અરજીઓ પર એવો કર લાદે છે, જેના માટે કોંગ્રેસ તરફથી કોઈ સત્તા આપવામાં આવી નથી. H-1B અરજીઓ પર 1 લાખ ડોલરનો કર લાદવાની કોઈ કાનૂની જોગવાઈ નથી."
સપ્ટેમ્બર 2025માં જાહેર કરાયેલા રાષ્ટ્રપતિના આદેશ હેઠળ નવા H-1B વિઝા માટે અરજી કરનાર નોકરીદાતાઓને વધારાના 1 લાખ ડોલર ચૂકવવાની ફરજ પાડવામાં આવી હતી. ટ્રમ્પ પ્રશાસનનું કહેવું હતું કે H-1B કાર્યક્રમનો ઉપયોગ કરીને અમેરિકન કર્મચારીઓની જગ્યાએ વિદેશી કર્મચારીઓને રાખવામાં આવે છે અને ખાસ કરીને STEM (સાયન્સ, ટેક્નોલોજી, એન્જિનિયરિંગ અને ગણિત) ક્ષેત્રોમાં વેતન પર દબાણ આવે છે.
રાજ્યોએ દલીલ કરી હતી કે આટલી મોટી ફી જાહેર શાળાઓ, યુનિવર્સિટીઓ અને આરોગ્યસંભાળ સંસ્થાઓ માટે કુશળ વિદેશી વ્યાવસાયિકોની ભરતી વધુ મુશ્કેલ બનાવશે, જેના કારણે પહેલાથી રહેલી કર્મચારીઓની અછત વધુ ગંભીર બની શકે છે. કોર્ટે પણ આ દલીલ સાથે સહમતિ દર્શાવી.
જજે પ્રશાસનની આ દલીલ પણ નકારી કાઢી કે ઇમિગ્રેશન કાયદા હેઠળ રાષ્ટ્રપતિને મળેલી વ્યાપક સત્તાઓના આધારે આવી ફી પ્રવેશની શરત તરીકે લાદી શકાય.
સોરોકિને લખ્યું કે, "વિદેશી નાગરિકોના પ્રવેશ અને પ્રતિબંધ અંગે કાર્યપાલિકા પાસે વિશાળ સત્તાઓ છે, પરંતુ તે અમર્યાદિત નથી." તેમણે ઉમેર્યું કે આ સત્તાઓ બંધારણીય મર્યાદાઓ અથવા કોંગ્રેસ દ્વારા આપવામાં આવેલી કાનૂની સત્તાને ઓળંગી શકતી નથી.
કેસનો મુખ્ય મુદ્દો એ હતો કે આ ફી ખરેખર ઇમિગ્રેશન નિયંત્રણનો ભાગ હતી કે પછી એક ગેરઅધિકૃત કર. કોર્ટે સ્પષ્ટ કર્યું કે આ ફી એક કર સમાન હતી.
જજે લખ્યું કે, "કર કોઈ 'પ્રતિબંધ' નથી," અને ઇમિગ્રેશન એન્ડ નેશનાલિટી એક્ટ (INA) હેઠળ સરકાર દ્વારા કરવામાં આવેલી વ્યાખ્યાને ફગાવી દીધી.
તેમણે વધુમાં જણાવ્યું કે કોંગ્રેસે ઇમિગ્રેશન કાયદા દ્વારા રાષ્ટ્રપતિને કર લાદવાની પોતાની વિશિષ્ટ સત્તા ક્યારેય સોંપી નથી.
બંધારણીય મુદ્દાઓ ઉપરાંત કોર્ટે એ પણ નોંધ્યું કે સંબંધિત ફેડરલ એજન્સીઓએ જરૂરી જાહેર ચર્ચા અને અભિપ્રાય (notice-and-comment) પ્રક્રિયા અનુસર્યા વિના નીતિ અમલમાં મૂકી હતી, જે Administrative Procedure Actનું ઉલ્લંઘન છે.
ચુકાદામાં જણાવાયું કે એજન્સીઓએ નોકરીદાતાઓ પર આટલો મોટો આર્થિક બોજ કેમ મૂકવામાં આવ્યો તેની યોગ્ય અને વાજબી સમજૂતી પણ આપી નહોતી.
અંતે કોર્ટે આ નીતિને ગેરકાયદેસર જાહેર કરીને તેના અમલીકરણ માટે લેવામાં આવેલા તમામ સરકારી પગલાં રદ કરી દીધા.
ઉલ્લેખનીય છે કે H-1B વિઝા કાર્યક્રમ હેઠળ અમેરિકન કંપનીઓ વિશેષ જ્ઞાન અને ઓછામાં ઓછી બેચલર ડિગ્રી અથવા સમકક્ષ લાયકાત ધરાવતા વિદેશી વ્યાવસાયિકોને નોકરી પર રાખી શકે છે.
હાલમાં કોંગ્રેસ દર વર્ષે મોટાભાગની નવી H-1B વિઝા માટે 65,000ની મર્યાદા નક્કી કરે છે, જ્યારે અમેરિકાની ઉચ્ચ ડિગ્રી ધરાવતા અરજદારો માટે વધારાના 20,000 વિઝા ફાળવવામાં આવે છે. યુનિવર્સિટીઓ, તેમની સાથે સંકળાયેલી બિનનફાકારક સંસ્થાઓ અને કેટલીક સંશોધન સંસ્થાઓને આ વાર્ષિક મર્યાદામાંથી મુક્તિ આપવામાં આવે છે.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Leave A Comment
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login