ADVERTISEMENT
ADVERTISEMENT
ਆਰਕੇਡੀਆ ਦੀ ਮੇਅਰ ਨੇ ਚੀਨੀ ਏਜੰਟ ਵਜੋਂ ਕੰਮ ਕਰਨ ਦਾ ਮੰਨਿਆ ਦੋਸ਼
ਅਮਰੀਕੀ ਨਿਆਂ ਵਿਭਾਗ ਦੇ ਇਸ ਖੁਲਾਸੇ ਤੋਂ ਬਾਅਦ ਅਰਕੇਡੀਆ ਦੀ ਰਾਜਨੀਤੀ ਵਿੱਚ ਹਲਚਲ ਮਚ ਗਈ ਹੈ
-
1759953093.png)
ਸਟਾਫ ਪੱਤਰਕਾਰ - Thu, 14, May 2026
- 08:44 EDT
- 35
ਅਰਕੇਡੀਆ ਦੀ ਮੇਅਰ ਆਈਲੀਨ ਵਾਂਗ / staff reporter
ਅਰਕੇਡੀਆ ਦੀ ਮੇਅਰ ਆਈਲੀਨ ਵਾਂਗ ਨੇ ਗੈਰ-ਕਾਨੂੰਨੀ ਤੌਰ ‘ਤੇ ਵਿਦੇਸ਼ੀ ਏਜੰਟ ਵਜੋਂ ਕੰਮ ਕਰਨ ਅਤੇ ਚੀਨੀ ਪ੍ਰਚਾਰ ਨੂੰ ਉਤਸ਼ਾਹਿਤ ਕਰਨ ਨਾਲ ਸਬੰਧਤ ਸੰਘੀ ਦੋਸ਼ ਮੰਨਣ ਲਈ ਸਹਿਮਤੀ ਜਤਾਈ ਹੈ। ਅਮਰੀਕੀ ਨਿਆਂ ਵਿਭਾਗ ਦੇ ਇਸ ਖੁਲਾਸੇ ਤੋਂ ਬਾਅਦ ਅਰਕੇਡੀਆ ਦੀ ਰਾਜਨੀਤੀ ਵਿੱਚ ਹਲਚਲ ਮਚ ਗਈ ਹੈ।
ਸ਼ਹਿਰ ਦੇ ਅਧਿਕਾਰੀਆਂ ਅਨੁਸਾਰ, 58 ਸਾਲਾ ਆਈਲੀਨ ਵਾਂਗ ਨੇ ਸੋਮਵਾਰ ਅਰਕੇਡੀਆ ਸਿਟੀ ਹਾਲ ਵਿੱਚ ਆਪਣਾ ਅਸਤੀਫਾ ਸੌਂਪ ਦਿੱਤਾ। ਇਹ ਕਦਮ ਉਸ ਵੇਲੇ ਸਾਹਮਣੇ ਆਇਆ ਜਦੋਂ ਨਿਆਂ ਵਿਭਾਗ ਵੱਲੋਂ ਉਨ੍ਹਾਂ ਖ਼ਿਲਾਫ਼ ਪਟੀਸ਼ਨ ਸਮਝੌਤੇ ਨੂੰ ਜਨਤਕ ਕੀਤਾ ਗਿਆ।
ਸੰਘੀ ਜਾਂਚਕਰਤਾਵਾਂ ਦਾ ਦਾਅਵਾ ਹੈ ਕਿ ਵਾਂਗ ਅਤੇ ਉਸ ਦੇ ਤਤਕਾਲੀ ਮੰਗੇਤਰ ਯਾਓਨਿੰਗ “ਮਾਈਕ” ਸੁਨ ਨੇ ਮਿਲ ਕੇ “ਯੂਐਸ ਨਿਊਜ਼ ਸੈਂਟਰ” ਨਾਮ ਦੀ ਇੱਕ ਵੈੱਬਸਾਈਟ ਚਲਾਈ- ਦੋਸ਼ਾਂ ਮੁਤਾਬਕ, ਇਸ ਵੈੱਬਸਾਈਟ ਰਾਹੀਂ ਚੀਨ ਦੀ ਸਰਕਾਰ, ਜਿਸਨੂੰ ਪੀਪਲਜ਼ ਰੀਪਬਲਿਕ ਆਫ਼ ਚਾਈਨਾ (ਪੀਆਰਸੀ) ਕਿਹਾ ਜਾਂਦਾ ਹੈ, ਦੇ ਹੱਕ ਵਿੱਚ ਸਮੱਗਰੀ ਅਤੇ ਪ੍ਰਚਾਰ ਫੈਲਾਇਆ ਜਾਂਦਾ ਸੀ।
ਜਾਂਚਕਰਤਾਵਾਂ ਦਾ ਕਹਿਣਾ ਹੈ ਕਿ ਵਾਂਗ ਨੇ ਉਨ੍ਹਾਂ ਲੋਕਾਂ ਦੇ ਹਿੱਤਾਂ ਦੀ ਰੱਖਿਆ ਕਰਨ ਦੀ ਬਜਾਏ, ਜਿਨ੍ਹਾਂ ਨੇ ਉਨ੍ਹਾਂ ਨੂੰ ਚੁਣਿਆ ਸੀ, ਚੀਨੀ ਸਰਕਾਰ ਦੇ ਹਿੱਤਾਂ ਲਈ ਕੰਮ ਕੀਤਾ। ਨਿਆਂ ਵਿਭਾਗ ਅਨੁਸਾਰ, ਵਾਂਗ ਨੂੰ ਪੀਆਰਸੀ ਸਰਕਾਰੀ ਅਧਿਕਾਰੀਆਂ ਵੱਲੋਂ ਵੈੱਬਸਾਈਟ ‘ਤੇ ਚੀਨ-ਪੱਖੀ ਸਮੱਗਰੀ ਪੋਸਟ ਕਰਨ ਲਈ ਨਿਰਦੇਸ਼ ਮਿਲਦੇ ਸਨ ਅਤੇ ਉਹ ਉਨ੍ਹਾਂ ਨੂੰ ਲਾਗੂ ਵੀ ਕਰਦੀ ਸੀ। ਕਈ ਮੌਕਿਆਂ ‘ਤੇ ਉਹ ਹੋਰ ਸਮੱਗਰੀ ਪ੍ਰਕਾਸ਼ਿਤ ਕਰਨ ਤੋਂ ਪਹਿਲਾਂ ਚੀਨੀ ਅਧਿਕਾਰੀਆਂ ਤੋਂ ਮਨਜ਼ੂਰੀ ਵੀ ਮੰਗਦੀ ਸੀ।
ਸੋਮਵਾਰ ਨੂੰ ਜਨਤਕ ਕੀਤੇ ਗਏ ਅਦਾਲਤੀ ਦਸਤਾਵੇਜ਼ਾਂ ਵਿੱਚ ਦਰਸਾਇਆ ਗਿਆ ਹੈ ਕਿ ਜਦੋਂ ਵੀ ਵਾਂਗ ਚੀਨੀ ਅਧਿਕਾਰੀਆਂ ਦੇ ਨਿਰਦੇਸ਼ਾਂ ‘ਤੇ ਸਮੱਗਰੀ ਪੋਸਟ ਕਰਦੀ ਸੀ, ਉਹ ਉਸ ਵੇਲੇ ਸੰਯੁਕਤ ਰਾਜ ਅਮਰੀਕਾ ਵਿੱਚ ਮੌਜੂਦ ਹੁੰਦੀ ਸੀ। ਇਸ ਤੋਂ ਇਲਾਵਾ, ਵੈੱਬਸਾਈਟ ‘ਤੇ ਕਦੇ ਵੀ ਇਹ ਖੁਲਾਸਾ ਨਹੀਂ ਕੀਤਾ ਗਿਆ ਕਿ ਕੁਝ ਸਮੱਗਰੀ ਚੀਨੀ ਸਰਕਾਰ ਦੇ ਨਿਰਦੇਸ਼ਾਂ ‘ਤੇ ਪ੍ਰਕਾਸ਼ਿਤ ਕੀਤੀ ਗਈ ਸੀ।
ਸਹਾਇਕ ਸੰਯੁਕਤ ਰਾਜ ਅਟਾਰਨੀ ਅਮਾਂਡਾ ਬੀ. ਐਲਬੋਜਨ ਨੇ ਕਿਹਾ, “ਜੇ ਤੁਸੀਂ ਵੈੱਬਸਾਈਟ ਵੇਖਦੇ, ਤਾਂ ਇਹ ਇੱਕ ਸਧਾਰਣ ਖ਼ਬਰ ਮੰਚ ਵਾਂਗ ਲੱਗਦੀ ਸੀ, ਜਿਸ ਵਿੱਚ ਰੋਜ਼ਾਨਾ ਦੀਆਂ ਖ਼ਬਰਾਂ ਅਤੇ ਹੋਰ ਆਮ ਜਾਣਕਾਰੀ ਹੁੰਦੀ ਸੀ। ਪਰ ਇਨ੍ਹਾਂ ਆਮ ਖ਼ਬਰਾਂ ਦੇ ਵਿਚਕਾਰ ਪ੍ਰਚਾਰ ਸਮੱਗਰੀ ਵੀ ਸ਼ਾਮਲ ਕੀਤੀ ਜਾਂਦੀ ਸੀ।”
ਨਿਆਂ ਵਿਭਾਗ ਅਨੁਸਾਰ, ਇੱਕ ਮਾਮਲੇ ਵਿੱਚ ਇੱਕ ਚੀਨੀ ਅਧਿਕਾਰੀ ਨੇ ਵਾਂਗ ਨੂੰ ਪਹਿਲਾਂ ਤੋਂ ਤਿਆਰ ਕੀਤੇ ਲੇਖ ਭੇਜੇ, ਜਿਨ੍ਹਾਂ ਨੂੰ ਉਸ ਨੇ ਆਪਣੀ ਵੈੱਬਸਾਈਟ ‘ਤੇ ਪ੍ਰਕਾਸ਼ਿਤ ਕੀਤਾ। ਬਾਅਦ ਵਿੱਚ ਉਸ ਨੇ ਵੀਚੈਟ ਰਾਹੀਂ ਚੀਨੀ ਅਧਿਕਾਰੀ ਨੂੰ ਉਸ ਲੇਖ ਦਾ ਲਿੰਕ ਭੇਜਿਆ। ਇੱਕ ਹੋਰ ਮਾਮਲੇ ਵਿੱਚ ਵਾਂਗ ਨੇ ਇੱਕ ਲੇਖ ਵਿੱਚ ਸੋਧ ਕਰਨ ਤੋਂ ਬਾਅਦ ਚੀਨੀ ਅਧਿਕਾਰੀ ਨੂੰ ਲਿੰਕ ਅਤੇ ਸਕ੍ਰੀਨਸ਼ਾਟ ਭੇਜੇ, ਜਿਸ ਵਿੱਚ ਦਿਖਾਇਆ ਗਿਆ ਸੀ ਕਿ ਲੇਖ ਨੂੰ 15 ਹਜ਼ਾਰ ਤੋਂ ਵੱਧ ਵਾਰ ਦੇਖਿਆ ਗਿਆ। ਦਸਤਾਵੇਜ਼ਾਂ ਮੁਤਾਬਕ, ਇਸ ਦੇ ਜਵਾਬ ਵਿੱਚ ਅਧਿਕਾਰੀ ਨੇ “ਸ਼ਾਨਦਾਰ!” ਲਿਖਿਆ, ਜਿਸ ‘ਤੇ ਵਾਂਗ ਨੇ ਕਥਿਤ ਤੌਰ ‘ਤੇ ਜਵਾਬ ਦਿੱਤਾ, “ਧੰਨਵਾਦ।”
ਆਈਲੀਨ ਵਾਂਗ ਨੂੰ ਨਵੰਬਰ 2022 ਵਿੱਚ ਅਰਕੇਡੀਆ ਸਿਟੀ ਕੌਂਸਲ ਲਈ ਚੁਣਿਆ ਗਿਆ ਸੀ। ਅਰਕੇਡੀਆ ਵਿੱਚ ਪੰਜ ਮੈਂਬਰੀ ਕੌਂਸਲ ਹੈ, ਜਿਸ ਵਿੱਚੋਂ ਮੇਅਰ ਦੀ ਚੋਣ ਘੁੰਮਦੇ ਅਧਾਰ ‘ਤੇ ਕੀਤੀ ਜਾਂਦੀ ਹੈ। ਅਧਿਕਾਰੀਆਂ ਅਨੁਸਾਰ, ਵਾਂਗ ਖ਼ਿਲਾਫ਼ ਲਗੇ ਦੋਸ਼ ਉਸ ਸਮੇਂ ਦੇ ਹਨ ਜਦੋਂ ਉਹ ਅਜੇ ਜਨਤਕ ਅਹੁਦੇ ‘ਤੇ ਨਹੀਂ ਸਨ।
ਸੈਂਟਰਲ ਡਿਸਟ੍ਰਿਕਟ ਆਫ਼ ਕੈਲੀਫੋਰਨੀਆ ਲਈ ਫਸਟ ਅਸਿਸਟੈਂਟ ਯੂਐਸ ਅਟਾਰਨੀ ਬਿਲ ਐਸੇਲੀ ਨੇ ਕਿਹਾ, “ਜੋ ਲੋਕ ਵਿਦੇਸ਼ੀ ਸਰਕਾਰਾਂ ਲਈ ਗੁਪਤ ਤੌਰ ‘ਤੇ ਕੰਮ ਕਰਦੇ ਹਨ, ਉਹ ਸਾਡੇ ਲੋਕਤੰਤਰ ਨੂੰ ਕਮਜ਼ੋਰ ਕਰਦੇ ਹਨ। ਇਹ ਸਮਝੌਤਾ ਸਾਡੇ ਦੇਸ਼ ਦੇ ਅਦਾਰਿਆਂ ਨੂੰ ਵਿਦੇਸ਼ੀ ਪ੍ਰਭਾਵ ਤੋਂ ਬਚਾਉਣ ਦੇ ਯਤਨਾਂ ਵਿੱਚ ਇੱਕ ਮਹੱਤਵਪੂਰਨ ਕਦਮ ਹੈ।”
ਅਰਕੇਡੀਆ ਸ਼ਹਿਰ ਦੇ ਬੁਲਾਰੇ ਜਸਟਿਨ ਬਰੂਨੋ ਨੇ ਕਿਹਾ ਕਿ ਸ਼ਹਿਰ ਨੂੰ ਇਹ ਭਰੋਸਾ ਹੈ ਕਿ ਵਾਂਗ ਦੀਆਂ ਕਥਿਤ ਕਾਰਵਾਈਆਂ ਕਾਰਨ ਸ਼ਹਿਰ ਦੇ ਪ੍ਰਸ਼ਾਸਨ ਜਾਂ ਫ਼ੈਸਲਿਆਂ ‘ਤੇ ਕੋਈ ਅਸਰ ਨਹੀਂ ਪਿਆ। ਉਨ੍ਹਾਂ ਕਿਹਾ ਕਿ ਇੱਕ ਵਿਅਕਤੀਗਤ ਕੌਂਸਲ ਮੈਂਬਰ ਕੋਲ ਇਕੱਲੇ ਕੋਈ ਕਾਰਵਾਈ ਕਰਨ ਦਾ ਅਧਿਕਾਰ ਨਹੀਂ ਹੁੰਦਾ ਅਤੇ ਸਾਰੇ ਫ਼ੈਸਲੇ ਸਮੂਹਕ ਤੌਰ ‘ਤੇ ਲਏ ਜਾਂਦੇ ਹਨ।
ਇਸ ਦੌਰਾਨ, ਕੌਂਸਲ ਮੈਂਬਰ ਸ਼ੈਰਨ ਕਵਾਨ ਨੇ ਕਿਹਾ ਕਿ ਉਨ੍ਹਾਂ ਨੂੰ ਪਹਿਲਾਂ ਤੋਂ ਹੀ ਵਾਂਗ ਦੀਆਂ ਕੁਝ ਗਤੀਵਿਧੀਆਂ ‘ਤੇ ਸ਼ੱਕ ਸੀ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨੇ ਸਿਟੀ ਕੌਂਸਲ ਦੀਆਂ ਮੀਟਿੰਗਾਂ ਦੌਰਾਨ ਇਸ ਮਾਮਲੇ ਨੂੰ ਉਠਾਉਣ ਦੀ ਕੋਸ਼ਿਸ਼ ਕੀਤੀ ਸੀ, ਪਰ ਉਨ੍ਹਾਂ ਨੂੰ ਵਿਰੋਧ ਦਾ ਸਾਹਮਣਾ ਕਰਨਾ ਪਿਆ।
ਸ਼ੈਰਨ ਕਵਾਨ ਨੇ ਕਿਹਾ, “ਲੋਕਤੰਤਰ ਦੀ ਰੱਖਿਆ ਕਰਨਾ ਬਹੁਤ ਜ਼ਰੂਰੀ ਹੈ। ਇਹ ਯਕੀਨੀ ਬਣਾਉਣਾ ਲਾਜ਼ਮੀ ਹੈ ਕਿ ਕਿਸੇ ਵੀ ਤਰ੍ਹਾਂ ਦਾ ਵਿਦੇਸ਼ੀ ਪ੍ਰਭਾਵ ਸਾਡੇ ਸਿਸਟਮ ਵਿੱਚ ਦਖ਼ਲਅੰਦਾਜ਼ੀ ਨਾ ਕਰੇ।”
ਇਸ ਮਾਮਲੇ ਵਿੱਚ ਵਾਂਗ ਦੇ ਸਾਬਕਾ ਮੰਗੇਤਰ ਅਤੇ ਮੁਹਿੰਮ ਪ੍ਰਬੰਧਕ ਯਾਓਨਿੰਗ “ਮਾਈਕ” ਸੁਨ ਨੂੰ ਇਸ ਸਾਲ ਦੇ ਸ਼ੁਰੂ ਵਿੱਚ ਇੱਕ ਵਿਦੇਸ਼ੀ ਸਰਕਾਰ ਦੇ ਗੈਰ-ਕਾਨੂੰਨੀ ਏਜੰਟ ਵਜੋਂ ਕੰਮ ਕਰਨ ਦੇ ਦੋਸ਼ ਵਿੱਚ ਚਾਰ ਸਾਲ ਦੀ ਸੰਘੀ ਕੈਦ ਦੀ ਸਜ਼ਾ ਸੁਣਾਈ ਗਈ ਸੀ। ਹੁਣ ਆਈਲੀਨ ਵਾਂਗ ਨੂੰ ਵੀ ਗੈਰ-ਕਾਨੂੰਨੀ ਵਿਦੇਸ਼ੀ ਏਜੰਟ ਵਜੋਂ ਕੰਮ ਕਰਨ ਦੇ ਦੋਸ਼ ਹੇਠ ਦਸ ਸਾਲ ਤੱਕ ਦੀ ਕੈਦ ਹੋ ਸਕਦੀ ਹੈ। ਉਹ ਸੋਮਵਾਰ ਨੂੰ ਆਪਣੀ ਪਹਿਲੀ ਅਦਾਲਤੀ ਪੇਸ਼ੀ ਭੁਗਤ ਚੁੱਕੀ ਹੈ ਅਤੇ ਆਉਣ ਵਾਲੇ ਹਫ਼ਤਿਆਂ ਵਿੱਚ ਰਸਮੀ ਤੌਰ ‘ਤੇ ਦੋਸ਼ੀ ਮੰਨਣ ਦੀ ਉਮੀਦ ਹੈ।
Leave A Comment
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login